ՀՀ հանրակրթական ուսումնական հաստատությունների տեխնոլոգիական վերազինման և տեղեկատվական և հաղորդակցական նորարարական տեխնոլոգիաների տրամադրման ծրագիր

ՀՀ հանրակրթական ուսումնական հաստատությունների տեխնոլոգիական վերազինման և տեղեկատվական և հաղորդակցական նորարարական տեխնոլոգիաների տրամադրման ծրագիր

Նախաբան

Քսաներորդ դարի վերջում տեղեկատվական և հաղորդակցման տեխնոլոգիաների (այսուհետև ՏՀՏ) արագ զարգացումն ամբողջ աշխարհում նոր պահանջներ դրեց կրթական համակարգի առջև: Տեխնոլոգիական արագ առաջընթացը, արդի համաշխարհային զարգացումները և տնտեսության աճող բազմաձևությունը պահանջում են մարդկային հմտությունների և գիտելիքների շարունակական նորացում: Գիտատեխնիկական առաջընթացը` ի դեմս ՏՀՏ զարգացման, հանգեցրեց կրթական գործընթացի հանդեպ նախկին մոտեցումների և ընկալումների փոփոխության և ներառելով ինչպես միջնակարգ դպրոցը, այնպես էլ մասնագիտական կրթական համակարգը:

ՏՀՏ կիրառությունն ուսումնական  գործընթացում իր հետ բերում է կրթության որակի և մատչելիության բարեփոխումների լայն հնարավորություն: ՏՀՏ-ի ներդրումը ուսումնական գործընթացում թույլ է տալիս փոփոխել հին մոտեցումները, առաջադրել և իրագործել բոլորովին այլ, որակապես նոր խնդիրներ: Դրա վառ օրինակ է բնագիտական առարկաների վիրտուալ լաբորատորիաների ստեղծումը, որոնք թույլ են տալիս համակարգչով կատարել հետաքրքիր գիտափորձեր և կառուցել բնական երևույթների այնպիսի մոդելներ, որոնք իրական պայմաններում իրականացնելն անհնար է:

Այս ծրագրի նպատակն է` ՏՀՏ օգտագործման միջոցով բարձրացնել սովորողների առաջադիմությունն ու կատարելագործել դասավանդման որակը` նպաստելով ուսումնական գործընթացի ժամանակային և տարածական սահմանափակումների վերացմանը:

Հանրակրթական ուսումնական հաստատությունների տեխնոլոգիական վերազինման և տեղեկատվական և հաղորդակցական նորարարական տեխնոլոգիաների տրամադրման ծրագիր

Ծրագիրը գործելու է երկու ուղղություններով`

·         դպրոցներում "շրջիկ" նեթբուքային դասարանների հիմնում,

·         դպրոցներում առանձին նեթբուքային դասարանների հիմնում`  աշակերտների կողմից անձնական ներթբուքներ ձեռք բերելու միջոցով:

Առաջին դեպքում դպրոցը ձեռք է բերում նեթբուքային դասարանի հիմնման համար անհրաժեշտ բոլոր սարքավորումները, որոնք հանդիսանում են դպրոցի սեփականությունը: Երկրորդ դեպքում աշակերտները` ի դեմս ծնողների/օրինական խնամակալների ձեռք են բերում անհատական նեթբուքներ սեփականության իրավունքով, դպրոցը ձեռք է բերում նեթբուքային դասարանի հիմնման համար անհրաժեշտ մնացյալ սարքավորումները: Երկու պարագայում էլ ծրագիրը գործելու է շրջանառու համակարգի սկզբունքով, ինչը ենթադրում է, որ դպրոցների և/կամ ծնողների վճարումները վերաներդրվելու են համակարգում և օգտագործվելու են դպրոցների համար նորանոր տեխնոլոգիաների գնման նպատակով: Շրջանառու համակարգի շրջանակներում հանրակրթական հաստատությունները կկարողանան իրականացնել տեխնոլոգիական վերազինումն ու նորարարական տեխնոլոգիաների ձեռքբերումը երկամյա ապառիկ գնման սկզբունքներով:

Ծրագրի հիմնական սկզբունքները

• Ծրագրի ուղղություններից որևէ մեկում ընդգրկվելն իրականացվում է ըստ դպրոցի հայեցողության` համապատասխան պահանջները բավարարելու պարագայում:
• Դպրոցում շրջիկ նեթբուքային դասարան հիմնելու ենթածրագրում ընդգրկվելու դեպքում դպրոցներին տրամադրվում են նորարարական համակարգչային սարքավորումներ` դրանց արժեքը երկու տարվա ընթացքում մարելու պայմանով: Երկու տարվա ընթացքում վճարումները կանոնավոր և ժամանակին կատարելու դեպքում գումարը կհամարվի մարված և ստացված տեխնոլոգիաները կանցնեն դպրոցի տնօրինմանը: Դպրոցին իրավունք չի վերապահվում վաճառել կամ վարձակալման տալ ստացված սարքավորումները, մինչև դրանց դիմաց վճարման ենթակա գումարի լիակատար մարումը:
• Տեխնոլոգիաների արժեքի մարման տարեկան վճարները կատարելու համար դպրոցներն ըստ իրենց հայեցողության կարող են օգտվել անհրաժեշտ միջոցները ձեռք բերելու հասանելի և օրենսդրությամբ չարգելված աղբյուրներից: 
• Յուրաքանչյուր հաջորդ տարվա համար սարքավորումների դիմաց վճարները հավաքվում են ըստ ծրագրի շրջանակներում ընտրված առևտրային բանկի և դպրոցի միջև կնքված ապառիկ առուվաճառքի պայմանագրում նշված ժամանակացույցի: Եթե դպրոցը խախտում է այս ժամանակացույցը, նրան տրամադրված սարքավորումները կարող են հետ վերցվել և տրվել մեկ այլ դպրոցի նույն պայմաններով: Նոր դպրոցին տեխնոլոգիաները կտրվեն` ընդհանուր գնից հանելով մաշվածության չափը, որ գոյացել է այդ սարքավորումների օգտագործման ժամանակահատվածում: Դպրոցին, որից հետ կվերցվեն տեխնոլոգիաները, չի փոխհատուցվի նախկինում կատարված որևէ վճարում:
• Դպրոցում առանձին նեթբուքային դասարանի հիմնման ենթածրագրին մասնակցելու դեպքում դպրոցները պետք է ընտրեն այն դասարանը, որում իրականացվելու է ծրագիրը և այս դասարանում սովորող բոլոր աշակերտների ծնողների հետ համաձայնեցնեն ծրագրի բոլոր պայմանները: Տվյալ դասարանի բոլոր աշակերտները պետք է ներառվեն ծրագրում:
• Առանձին նեթբուքային դասարանի հիմնման դեպքում պահանջվող տեխնոլոգիաները բաժանվում են երկու խմբի` աշակերտների նեթբուքները, որոնց դիմաց վճարում են ծնողները և որոնք համարվում են աշակերտի սեփականությունը և նեթբուքային դասարանի հիմնման համար անհրաժեշտ այլ սարքավորումներ, որոնք ձեռք է բերում դպրոցը: Դպրոցի ձեռք բերած սարքավորումների մասով գործում է նույն կանոնակարգը, ինչ որ առաջին ենթածրագրի դեպքում:
• Աշակերտական նեթբուքների ձեռքբերման պարագայում ծնողը պարտավորվում է ապահովել դրա առաջնային նպատակային օգտագործումն աշակերտի կողմից դպրոցում` դասերի ընթացքում և տանը` դպրոցում տրված տնային հանձնարարությունները կատարելու ընթացքում:
• Աշակերտների նեթբուքները ծնողներին են տրամադրվում նույն` երկամյա ապառիկ գնման հիմունքներով: Երկու տարվա ընթացքում վճարումները կանոնավոր և ժամանակին կատարելու դեպքում գումարը համարվում է մարված և ստացված տեխնոլոգիաները անցնում են ծնողի տնօրինմանը: Ծնողին իրավունք չի վերապահվում վաճառել կամ վարձակալման տալ ստացված տեխնոլոգիաները, մինչև դրանց դիմաց վճարման ենթակա գումարի լիակատար մարումը:
• Առանձին նեթբուքային դասարանի հիմնման դեպքում դպրոցը տվյալ դասարանի յուրաքանչյուր ծնողի կամ օրինական ներկայացուցչի հետ կնքում է պարտավորությունների պայմանագիր, որտեղ նշվում են նեթբուքի ձեռքբերման և աշակերտի կողմից օգտագործման պայմանները:  
• Շրջիկ նեթբուքային դասարան հիմնելու համար ծնողներից գումարը հավաքելու պարագայում դպրոցը հաշվառում է յուրաքանչյուր աշակերտի կատարած վճարումները: Այդ հաշվառումների հիման վրա դպրոցի կողմից կազմվում են տարեկան հաշվետվություններ, որոնք հաստատվում են տվյալ դասարանի ծնողների կողմից և վավերացվում դպրոցի տնօրենի ստորագրությամբ:
• Յուրաքանչյուր հաջորդ տարվա համար աշակերտական նեթբուքների դիմաց մարման ենթակա գումարի տարեկան վճարները հավաքվում են ըստ ծրագրի շրջանակներում ընտրված առևտրային բանկի և ծնողի միջև կնքված ապառիկ առուվաճառքի պայմանագրում նշված ժամանակացույցի:

Ինչպես ընդգրկվել համակարգ

• Դպրոցները պետք է լրացնեն կից տրված դիմումների ձևերից որևէ մեկը` կախված նրանից, թե որ ենթածրագրում են ցանկանում ընդգրկվել, ինչպես նաև "Տեղեկություններ դպրոցի մասին" հավելվածը: Տեխնոլոգիաների անվանացանկը և նվազագույն տեխնիկական հատկորոշիչները տրված են կից հավելվածում:
• Դիմում-հայտ ներկայացրած դպրոցը հրավիրվում է Դասագրքերի շրջանառու հիմնադրամ` շրջանառու համակարգում ընդգրկման պայմանագիր կնքելու համար: Մինչև պայմանագրի կնքումը դպրոցի հետ համաձայնեցվում են նրա կողմից ձեռք բերվելիք տեխնոլոգիաների ցանկը, քանակները և տեխնիկական բնութագրերը:

Ինչ պետք է անի դպրոցը

• Դպրոցները պետք է ՆԱԽՕՐՈՔ ապահովեն տեխնոլոգիաների տեղադրման համար անհրաժեշտ բոլոր ֆիզիկական պայմանները` ներառյալ անհրաժեշտության դեպքում տեխնոլոգիաների տեղադրմանը հատկացվող դասասենյակի վերանորոգումը, հոսանքի լարերի անցկացումը, անհրաժեշտ քանակությամբ վարդակների և ապահովիչների տեղադրումը և այլն: 

Տեխնոլոգիաների մատակարարումը

• Դպրոցներին պայմանագրերի կնքման ժամանակ տրվում է Դասագրքերի շրջանառու հիմնադրամի հոգաբարձուների խորհրդի կողմից հաստատված մատակարար ընկերությունների ցանկ, որոնցից դպրոցն ընտրում է այն ընկերությունը, որից ցանկանում է ձեռք բերել սարքավորումները:
• Առանձին նեթբուքային դասարանի հիմնման ենթածրագրին մասնակցության դեպքում դպրոցը պարտավոր է ապահովել տվյալ դասարանի բոլոր ծնողների գրավոր համաձայնությունը մատակարար ընկերության ընտրության հարցում:
• Շրջիկ նեթբուքային դասարանի հիմնման ենթածրագրին մասնակցելու պարագայում դպրոցի տնօրենը առևտրային բանկի լիազոր ներկայացուցչի հետ կնքում է ապառիկ առուվաճառքի պայմանագիր, որում ամրագրվում են ձեռք բերվող սարքավորումների քանակներն ու տեխնիկական բնութագրերը, դրանց դիմաց վճարման ենթակա ընդհանուր գումարը և վճարման ժամանակացույցը: Բանկի և դպրոցի միջև կնքվող պայմանագրում ամրագրվում են նաև վճարումների ժամանակացույցի խախտման դեպքում առաջացող հետևանքները:
• Առանձին նեթբուքային դասարանի հիմնման ենթածրագրին մասնակցության պարագայում ծրագրին մասնակցող դասարանի յուրաքանչյուր ծնող առևտրային բանկի լիազոր ներկայացուցչի հետ կնքում է ապառիկ առուվաճառքի պայմանագիր` աշակերտական նեթբուքի ձեռքբերման վերաբերյալ: Տվյալ դպրոցի տնօրենը առևտրային բանկի լիազոր ներկայացուցչի հետ կնքում է ապառիկ առուվաճառքի պայմանագիր դպրոցի կողմից ձեռք բերվող սարքավորումների մասով: Ապառիկ առուվաճառքի պայմանագրերում ամրագրվում են ձեռք բերվող սարքավորումների քանակները, դրանց տեխնիկական բնութագրերը, վճարման ենթակա ընդհանուր գումարը և վճարման ժամանակացույցը: Դպրոցի և բանկի, ինչպես նաև ծնողի և բանկի միջև կնքվող պայմանագրում ամրագրվում են նաև վճարումների ժամանակացույցի խախտման դեպքում առաջացող հետևանքները:
• Դպրոցները պետք է հետևեն, որ ըստ պայմանագրի դպրոցին տրամադրված տեխնոլոգիաները հաղթող մատակարար ընկերության կողմից առաքվեն, տեղադրվեն նախապես հատկացված դասասենյակներում և ստուգեն դրանց սարքին լինելը:
• Առանձին նեթբուքային դասարանների հիմնման ենթածրագրին մասնակցելու պարագայում մատակարար կազմակերպության կողմից տրամադրված աշակերտական նեթբուքները առաքվում են դպրոց, տվյալ դասարանի բոլոր աշակերտների ծնողների մասնակցությամբ ստուգվում է դրանց սարքին լինելը և յուրաքանչյուր աշակերտական նեթբուք տրվում է  տվյալ աշակերտի ծնողին/օրինական ներկայացուցչին:

Ով է պատասխանատու տեխնոլոգիաների պահմանման համար

• Դպրոցները պատասխանատու են շրջիկ նեթբուքային դասարանի սարքավորումների պահպանման և վերանորոգման համար:
• Աշակերտական նեթբուքներ ձեռք բերելու պարագայում աշակերտի նեթբուքի պահպանման և վերանորոգման հարցերը կարգավորում են դպրոցի և ծնողի միջև կնքվող պարտավորությունների պայմանագրով:
• Մատակարար ընկերությունը սարքավորումների համար իրականացնում է երաշխիքային սպասարկում: 
• Դպրոցներին խորհուրդ է տրվում մշակել, դպրոցական խորհրդի կողմից հաստատել և մանկավարժական խորհրդի հետ համաձայնեցնել տեխնոլոգիաների օգտագործման ներքին քաղաքականություն:

Ներկայումս զարգացած երկրներում ոողջ կյանքի ընթացքում սովորելը, հեռաուսուցումը և ինքնագնահատումը դառնում են նոր դարաշրջանի չափորոշիչներ: Համակարգչից և ինտերնետից օգտվելու կարողությունն այսօր անհրաժեշտություն է դարձել: Հաշվի առնելով վերոնշյալը` այս շրջանառու համակարգում ընդգրկվելով դպրոցը հնարավորություն կստանա արտոնյալ պայմաններով ձեռք բերել անհրաժեշտ տեխնոլոգիաները, բարձրացնել ուսուցման որակը, առաջադիմության ցուցանիշները, կրթել ժամանակակից աշխարհում հաջողության հասնելու համար ավելի պատրաստված սերունդ: